Tag Archives: ՎԱԶԳԵՆ ՇՈՒՇԱՆՅԱՆ

ՎԱԶԳԵՆ ՇՈՒՇԱՆՅԱՆ

22 Դկտ

Կանցնեն բոլոր վերքերն ու բոլոր հուսահատությունները, բոլոր նվաստացումներն ու բոլոր ստրջանքները,- ինչ որ կմնա հայ մանուկն է հայրենի հողին վրա: Ահա այս պետք է ըլլա մեր Ալֆան ու մեր Օմեղան, մեր ճշմարտությունն ու մեր արդարությունը: Թող այս օտար եզերքներուն վրա մեր վերջին երգը լռե հավիտյանս հավիտենից, միայն թե հայ շինականը լուսաբացին կարենա իր զվարթությունը մրմնջել:
Թող նոր աժդահա մը ելլեր Երկոքին Մասյաց վրա, սրունքներեն մեկը նետեր մեկ լեռան ու մյուսը` Արագածի լերկ գագաթին ու ողջ հայոց աշխարհը երիկամունքներեն սարսող ձայնով մը որոտոտ, լեցնելով կիրճերու մեր խոնարհ գյուղերը, Սանահինեն մինչև Սևանի եզերքը, Զանգեզուրեն մինչև Շիրակա դաշտ, թող որոտը գոռալով թավալեր ավաններեն ու քաղաքներեն:
Կանցնին բոլոր փոթորիկներն ու բոլոր ահագնադղորդ պատերազմները, կանցնին բոլոր հորդաներն ու բոլոր բարբարոսները, կանցնին բոլոր հերետիկոսներն ու բոլոր պզտիկ պարոնները` իրենց սուտ իմաստությամբ: Հայոց ազգ, քայլերդ դուրս մի նետեր այս ավանդակներեն, այս ծործորներեն ու այս խոպան հողերեն: Եթե նույնիսկ բազուկներդ չկրնան հրացան բռնել` մագիլներովդ ճանկե արդարությունդ, եթե նույնիսկ ստիպված ըլլաս անգամ մը ևս ողնաշարդ ծռել, ողջ հասակովդ ընկիր մեր կարմիր հողերուն վրա: Ավելի լավ է սողալ այստեղ, քան թե գլուխ ցցել ուրիշին սահմաններուն վրա: Ոչ մեկ նոր ելք այլևս այս հողերեն: Ճակատագիրդ հոս է, և սրբությունդ` հոս, վասնզի հոսկե է միայն, որ վաղը բոլոր փառքերը կրնան արթննալ և բոլոր ցորենները բարձրանալ գեղուղեշ, բոլոր ակոսներեն…

%d bloggers like this: