Tag Archives: պակաս

ՊԱԿԱՍԸ

6 Մրտ

Կար-չկար` ինչ-որ բանի պակաս կար: Ու այդ պակասը այնքան շատ էր, որ չգիտեին, թե ուր լցնեն: Փնտրեցին-փնտրեցին, վերջապես գտան մի տեղ, որը ոչ մի տեղն էր: Բայց այդ ոչ մի տեղի տեղը ոչ ոք չգիտեր, բացի ոչ մեկից: Եկան, գտան այդ ոչ մեկին, խնդրեցին-աղաչեցին, թե` ի՞նչ կլինի, մեզ ասա դրա տեղը, մենք ոչ մեկին չենք ասի: Սա էլ չեմուչում արեց, թե` մինչև մի բան չտաք` չեմ ասի: Գնացին, որ մի բան գտնեն, բերեն, տան սրան: Ուր ասես, որ չհարցրեցին` ուրիշ ինչ ասես կար, բայց ոչ մի բան չկար: Վերջը հանդիպեցին մեկին, սա էլ ասաց, որ չգիտեմ որտեղ ոչ մի բան է տեսել, բայց ինչ իմանաս` ու՞մ մոտ է: Սրանք էլ վեր կացան, գնացին չգիտեմ որտեղ, տեսան ոչ մի բան էլ չկա, բայց այնքան պակաս բան կա, որ չեն իմանում ` ինչ անեն: Ճարները կտրած առան սրանց պակասը, բերեցին, խառնեցին իրենց պակասին ու հետո վեր կացան, որ գնան, մի տեղ գտնեն, եղածը լցնեն: Ու մնաց այս պատմությունը` ասելու, որ եթե մի բան չես իմանում ` մի ասա:

Հովիկ Չարխչյան

%d bloggers like this: