Պահոց | ԳՐԱԿԱՆՈՒԹՅՈՒՆ RSS feed for this section

ՄԻԱՅՆ ԱՅԴՔԱՆԸ

18 Մյս

Ինձ դուր է գալիս այդպես ապրելը: Ինձ հարազատ է առավոտի մեջ լինելը, որ հետո երեկոն իր սկիզբն ունենա: Ինձ համար սիրելի են բոլոր նրանք, ովքեր արթնանում են, որպեսզի գիշերը քուն մտնեն այն միամիտ հույսով, թե ապրեցին այս օրը վաղվա համար: Եվ ես ուզում եմ լինել բոլոր այդ մարդկանց կողքին, նրանց օրվա մեջ, նրանց մտքերում, նրանց հաջողությունների ու ձախողումների հետ, կորուստների ու հայտնությունների ժամանակ, լինել այնքան, որքան տրված է ու որքան ուզում է ցանկությունս: Ես սիրում եմ նրանց սիրելը, նրանց հիասթափություններն ու տխրությունը, լարված հայացքները, երբ պատասխան չի լինում, սեղմված մատները, երբ ուրիշ է ելքը, առկայծող աչքերը, եթե մոտ է ցանկալին, խաղաղ շնչառությունը, երբ հրաժեշտ են տալիս: Ես ինքս էլ նրանցից մեկն եմ, և ուրիշ ոչինչ ինձ պետք չէ, բացի նրանցից մեկը լինելը: Միայն այդքանը:
Այսօր էլ, ինչպես ամեն մի օր, լինելու է այն, ինչ լինելու է: Դա է մեր փրկությունը: Մեր բոլորի միակ փրկությունը հենց դա է: Եվ հենց սա է միակ անվիճելին, պատասխանների պատասխանը, ցանկություններից առաջինն ու վերջինը, համոզմունքներից անքննելին ու կասկածներից անմեղը:

Հովիկ Չարխչյան

flower-growing

Advertisements

ՍԿԶԲՈՒՄ ՍԽԱԼՎԵՑ

14 Մյս

Բրիտանացի գրող Ջոան Ռոուլինգն իր «Հարի Փոթեր» գրքի առաջին մասն ավարտեց 1995 թվականին և այն առաքեց 12 հրատարակիչների: Բոլորն էլ մերժեցին գրողին: Միայն մեկ տարի անց լոնդոնյան Bloomsbury փոքրիկ հրատարակչութունը համաձայնեց լույս ընծայել գիրքը, սակայն հրատարակիչն այնուամենայնիվ հարկ համարեց հեղինակին խորհուրդ տալ, որ նա զբաղվի այլ գործով: «Մանկական գրքեր գրելը քո խելքի բանը չէ, ավելի լուրջ աշխատանք գտիր»,- ասաց նա Ռոուլինգին:

HP_01.2

ՏԽՈՒՐ ՄԱՐԴԸ

14 Մյս

Տխուր մարդն ամաչում է իր տխրության համար: Նա նստում է քեզ հետ, կատակներ է անում, ծիծաղում է ամենաբարձրը, սակայն տխրությունն աչքերից այնպես է ծորում, որ նա ոչինչ չի կարող անել այդ հոսքն ընդհատելու համար: Նրա բառերը հատու են և անարժեք, նրա շարժումները կտրուկ են, իսկ մատներն՝ անհանգիստ: Նա դեռ շարունակելու է հավատալ, թե ոչինչ չի կարող մատնել իր տխրությունը: Նա ազնվորեն չի ցանկանում լսել այդ մասին, ու եթե անզգուշաբար հարցնես, կասի՝ ամեն ինչ կարգին է, հետո նորից կկրկնի, որ ինքն էլ համոզվի: Նա կմնա քեզ հետ երկար ու կերազի միայնության մասին: Նա ինքը բազում հարցեր կտա ու պատմություններ կհիշի, սակայն ուզածը լռությունն է լինելու: Բայց նա սարսափում է թե մեկից, թե մյուսից: Ամեն ինչ, միայն թե ոչ լռությունը միայնության կողքին, ամեն ինչ, բայց ոչ անզորությունը: Տխրությունը վիշտ չէ, որ փարատես, ցավ չէ, որ մեղմես մխիթարանքով: Դրա համար էլ տխրել չի ուզում, ինչ էլ որ լինի: Ինչ էլ որ լինի:
Ուրեմն պետք չէ տխրել նաև անցնող օրվա համար, և ամպամած երկնքի համար, և չարդարացված հույսերի համար, և այրված ծխախոտի համար, և անորոշ սպասման համար, և դատարկ բառերի համար, և մեռած մարդկանց համար, և քաղցր հուշերի համար, և թափված գինու համար, և երկրի պտույտի համար: Ոչնչի համար պետք չէ տխրել: Ընդամենը ափսոսալ է պետք: Ու մենք բոլորս էլ ափսոսալու ենք, որովհետև երբ կանցնի ժամանակը, օրը, տարին, դարը, տխրությունից ոչինչ չի հիշվելու, սակայն երկարակյաց կլինի ափսոսանքը՝ մարդու համար արարված:

Հովիկ Չարխչյան

teen-depression-e1511358524718-1440x564_c

Նիկոլ Փաշինյանը պետք է ապացուցի, որ այն, ինչ իրագործեց, արժանի է հեղափոխություն կոչվելու․Հովիկ Չարխչյան. ՏԵՍԱՆՅՈՒԹ

4 Մյս

«Նիկոլ Փաշինյանը շատ հիմար վիճակում դրեց բոլոր այն քաղաքական վերլուծաբաններին, քաղտեխնոլոգներին, որոնք հաշված օրեր առաջ ասում էին, թե Հայաստանում դեռևս չկա կրիտիկական զանգված, և առաջիկա մեկ-երկու տարում փոփոխություն իրականացնել գրեթե անհնար է»,- Factor.am-ի հետ զրույցում նման տեսակետ է հայտնում գրող, գրականագետ Հովիկ Չարխչյանը՝ անդրադառնալով ԱԺ պատգամավոր, «Քաղաքացիական պայմանագիր» կուսակցության ղեկավար Նիկոլ Փաշինյանի առաջնորդած ընդդիմադիր շարժմանը։ Նա միևնույն ժամանակ շեշտում է, որ մենք հիմա թևակոխում ենք վտանգավոր մի փուլ, երբ անցած կլինի էյֆորիան և կգա սառը դատողությունների, հաշվարկների ժամանակը․ «Այն, ինչ կոչում ենք հակահեղափոխություն, անպայման գլուխ է բարձրացնելու, քանի որ այն ուժերը, որոնք մեկ տասնյակից ավել տարի իշխանության գլուխ էին կանգնած, մեկ անձի փոփոխությամբ չեն պայմանավորելու իրենց հեռացումը քաղաքական դաշտից և ոչ միայն»։ Մեր զրուցակիցը նկատում է, որ Նիկոլ Փաշինյանը և նրա համակիրները ներկա պահին հնչեցնում են հեղափոխական լոզունգներ՝ ընդհանուր դրույթներով, բայց որևէ առարկայական խոսակցություն չի եղել, թե ինչ է կատարվելու համակարգի հետ․ «Նիկոլ Փաշինյանը պետք է ապացուցի, որ այն, ինչ իրագործեց, ընդ որում՝ իրագործեց ժողովրդի աջակցությամբ, արժանի է հեղափոխություն կոչվելու։ Մենք հաղթել ենք ճակատամարտը, բայց պատերազմը դեռ առջևում է»։ Նա հավելում է, որ եթե Ն․Փաշինյանը կարողանում է երկրից մաքրել աղբը, նա կկարողանա երկիրն ազատել նաև գարշահոտությունից։

Աննա Բաբաջանյան

ՄԵՆ

22 Մրտ

Դու մենակ ես: Դու մեն-մենակ ես ու դու ոչինչ չունես: Այն ամենը, ինչ կա, քոնը չէ: Դրանք քոնը չեն, այլ տրվել են քեզ: Եվ քոնը չեն մտքերդ, և հույզերդ քոնը չեն, և տեսանելի ու աներևույթ աշխարհները քոնը լինել չեն կարող, որովհետև ի սկզբանե դրանք չկային, հետո ունեցար, իսկ եթե մի բան իր հատուցման գինն ունի, ուրեմն դա փոխառել ես մեկ այլ բանի դիմաց: Ունեցել ես ի տրիտուր: Վերցրել ես վերադարձման պայմանով:
Ընչազուրկ կյանքիդ երջանկության մեջ դու պիտի բարեբախտ լինես, երբ կուտակվեն շնչավորված իղձերդ, ապրեն միաբան իրենց մենության հետ քո մենության կողքին, սիրվեն ու սիրեն այն ջերմությամբ, որով ջերմանում է ծուխը, բայց չի մնում կրակի մեջ: Եվ մեկուսի գոյությանդ շեղջերի ամեն հատիկ քեզնից զոհաբերում կուզի, ամեն մի հունդ կպահանջի ծլարձակման կորով, ամեն հատիճ կապավինի քո առատաձեռն նվաղումին: Մինչև վերջին ջիղը, մինչև վերջին շունչը, մինչև վերջին ժամը: Եվ երբ ամեն-ամեն ինչ կավարտվի, քեզ կարող է մնալ ընդամենը մեկ բան` հիշատակը:

Հովիկ Չարխչյան

13

ՄՏՔԵՐ

11 Փտր

Ընտրիր, ասացին նրան. խե՞լք, թե՞ հարստություն: Իբրև խելացի մարդ նա ընտրեց հարստությունը:
Մեչիսլավ Շարգան

Խրամատներում աթեիստներ չկան:
Վիլյամ Քամինգս

Ժողովրդին առաջնորդելն ավելի հեշտ է, քան նրան տեղից շարժելը:
Դևիդ Ֆինկ

Ամեն ինչ վաղուց արդեն ասված է, բայց քանի որ ոչ ոք չի լսում, հարկ է լինում անընդհատ ետ վերադառնալ և ամեն բան կրկնել նորից:
Անդրե Ժիդ

Չինաստանի կայսր Ցյանլունը պոետներին մահապատժի էր ենթարկում տխուր բանաստեղծություններ գրելու համար:

Հավանականությունը, որ ինչ որ մեկը քեզ աչքով կտա, ուղիղ համեմատական է քո գործողությունների հիմարությանը:
Կինդսֆաթեր

Ձեզ ասում են, որ դուք խելացի ու բարի՞ եք: Թույլ մի տվեք, որ ձեզ խաբեն:
Եվգենի Կաշեև

Մենք արդեն գնացել ենք առաջ: Եկեք հիմա քայլենք առողջ դատողության կողմը:
Անատոլի Ռաս

Ձեր կյանքի երկարության հետ ոչինչ անել չեք կարող, բայց կարող եք ինչ-որ բան անել նրա լայնության և խորության հետ:
Shira Tehrani

Գուտենբերգը յուրաքանչյուրին դարձրեց ընթերցող: Քսերոքսը յուրաքանչյուրին դարձրեց հրատարակիչ:
Մարշալ Մաքլյուեն

Ավարտել գիրքը նույնն է, թե սեփական երեխայիդ դուրս բերես բակ ու այնտեղ գնդակահարես:
Թրումեն Կապոտե

Երբեմն հարվածը չի հասնում իր նպատակին, բայց մտադրությունը չի կարող վրիպել:
Ժան-Ժակ Ռուսսո

Այն հարցին, թե ինչ բան է ջազը Լուի Արմսթրոնգը սովորաբար պատասխանում էր. «Եվ դուք դեռ հարցնու՞մ եք… Գոնե ամաչեք»:

Երբեմն ինձ անհրաժեշտ է այն, ինչը միայն դուք կարող եք ապահովել` ձեր բացակայությունը:
Աշլի Բրիլլիանթ

Երկուսն էլ երիտասարդ էին, իսկ մեկը` գեղեցիկ:
Ջորջ Բայրոն

Երբ փակվում է երջանկություն տանող մի դուռը, բացվում է մյուսը: Սակայն մենք երբեմն այնքան երկար ենք նայում փակված դռանը, որ չենք նկատում բացվածը:
Հելեն Քելլեր

Մազերի թեփի դեմ լավագույն դեղամիջոցը գիլյոտինն է:
Ֆրանսիական

Սերը սնվում է ոչ միայն զգացմունքներով, այլ նա բիֆշտեքսով:
Կառլո Դոսսի

2017-09-14_134508

ԻՄ ԵՐԳԸ ԲՈՒՐՈՒՄ Է

3 Փտր

Երգեր կան, որոնք երբեք չես սիրելու: Գուցե և լավ երգեր, բայց դրանք քոնը չեն: Կհնչեն-կանցնեն ու ոչինչ չի մնա՝ ոչ թրթիռ, ոչ մեղեդու պատառիկ: Կլինի ձայնը ու հետո լռությունը: Ուրիշ ոչինչ: Կան երգեր էլ, որոնք արթնություն են բերում: Զվարթ ու տխուր, հարազատ ու քնքուշ: Կարևոր չէ: Նստած ես դու ինչ-որ տեղ կամ սպասում ես ինչ-որ մեկին և հանկարծ լսում ես երգը: Վազվզող աչքերդ կանգ են առնում, շունչդ պահում ես, որ երգը չխրտնի: Թաքուն նայում ես այնտեղ, որտեղից նա եկավ, հայացքդ սրում ես ու հանկարծ աշխարհը դառնում է ուրիշ, երգի պես թեթև, անմարմին: Դու էլ առաջվանը չես: Դու այնպիսին ես, ինչպես երգն է ուզում, որ լինես:
Բայց հազար-հազար հին ու նոր երգերի մեջ լինում է մեկը՝ քո երգը: Դու գտնում ես նրան հետո, երբ արդեն կրծքիդ տակ ջերմությունն է ապրում հիշողության տեսքով, երբ օրը անուն ունի, երբ ամեն անգամ քաղցր է վերապրումն ու սփոփանք է նրա մեջ թաթախվելը: Այնժամ դու հիշում ես երգը: Նա եղել էր այնտեղ, քո երազի պահին, նա երգել էր քո տաք գիշերների մեջ, նա բառեր էր տվել քո հույզերին՝ մնալով երգ:
Եվ կանցնի ժամանակը ու մի օր, բոլորովին պատահաբար ինչ-որ մեկը քեզ կհարցնի.
— Դու նկատե՞լ ես, որ այդ երգն իր բույրն ունի…
Ու դու կասես՝ ունի: Կասես՝ գիտեմ, որովհետև դա հենց այդպես է: Իմ երգը բուրում է…

Հովիկ Չարխչյան

تقسیمات-صوتی-صدای-انسان-600x330

ՄԱՀԻՑ ԱՌԱՋ

27 Հնվ

Պատմում են, որ իր մահից մի քանի ժամ առաջ Վիլյամ Սարոյանը հեռախոսով  հարցազրույց է տվել «Ասսոշեյթեդ պրես» գործակալությանը: Այդ զրույցի ժամանակ էլ նա ասել է. «Մենք բոլորս մահկանացուներ ենք, բայց ես միշտ հավատացել եմ, որ իմ դեպքում բացառություն կանեն: Եվ հիմա ի՞նչ …»:

photo_219682_146e6b7b8

ՍԽԱԼՆԵՐԻ ՄԱՍԻՆ

6 Հնվ

Երբ Եղիշե Չարենցը գրեց իր «Երկիր Նայիրի» վեպը, «Մուրճ» հանդեսն այդ առիթով մի գրախոսական տպագրեց, որտեղ ասվում էր. «Երկիր Նայիրին» մի վիպանման պոեմ է, որը կարելի է գրել տրամվայի մեջ կամ «Կաֆե Նայիրիում» նարդի խաղալիս: Անչափ ձգձգվում է, կրթություններով լի, թեև գրված է Ա. Բելու ու Գոգոլի նմանությամբ ու նրանց անմիջական ազդեցության տակ, բայց… դժբախտաբար, նրանց երգիծանքն ու խորաթափանցությունը, նրանց գունագեղությունն ու թափը չունի»…
Ամերիկացի հանրահայտ երգիչ Էլվիս Փրեսլիին լսելուց հետո երաժշտական քննադատ Ջեկ Հոուլդը 1956 թվականին գրեց. «Պարոն Փրեսլիի մոտ բացակայում է երգեցողության ընդունակության որևէ տարբերություն: Նրա մասնագիտացումը` ռիթմիկ երգեցողությունը նա կատարում է անհասկանալի ոռնոցի օգնությամբ: Նրա վոկալը, եթե դա կարելի է այդպես անվանել, կազմված է կարծրատիպային տարբերակներից: Նրան լսելը աներևակայելի ձանձրույթ է»…
Հետախոսի գյուտից առաջ «Բոստոն Փոստ» թերթը մի խմբագրական հոդված հրապարակեց, որտեղ ասվում էր. «Լավ տեղեկացված մարդիկ հասկանում են, որ ձայնը հնարավոր չէ հաղորդել լարերի միջոցով, իսկ այնտեղ, որտեղ նման բան հնարավոր է, դա չի կարող ունենալ ոչ մի գործնական նշանակություն»…
Եվ այսպես շարունակ… Որովհետև մարդիկ կարծիք հայտնելու իրավունք ունեն, իսկ սխալ կարծիքի համար չեն պատժում: Այլ բան է, որ նրանցից գրեթե ոչ ոք հետագայում ոչ կհիշի, ոչ էլ կխոստովանի, որ ինքը սխալվում էր:

Հովիկ Չարխչյան

a7c7e20ef55b9c6f68541bcec8a4cfb6_M

ԲԵԿՈՐԱՅԻՆ

31 Դկտ

Փշրվող խաղալիքը… Անպայման պիտի սահեր մատներիս միջից հատկապես այն պահին, երբ առավելագույնս զգույշ էի: Հատակին նրա բախվելը, բեկորների փայլը, իմ սրտի զարկը ու միտքը, որ արդեն փշրված է, մեղավորության երեխայական մի տխրություն էին ծնում` շաղախված այն խորին համոզմունքի հետ, թե դա ամենագեղեցիկն էր բոլոր խաղալիքներից:
Սա կրկնվում էր գրեթե ամեն տարի, թեև մորս մշտական խոսքը` «Չարը խափանվեց», մի չնչին մխիթարություն էր տալիս ու անտեսանելի ափով փակում էր զարդարվող տոնածառի այն հատվածը, որտեղ պիտի կախվեր փշրվածը: Եվ այդ ժամանակներից ի վեր բեկորներն ինձ համար դարձան հետապնդող մտասևեռում: Ցանկած բեկորի մեջ ես ճգնում էի տեսնել ամբողջը և այդ ամբողջը կորցնելու ցավը:
… Օրերս, երբ կրկին եղևնի էինք զարդարում, տղաս ասաց, որ իր գնած նոր խաղալիները չեն փշրվում, եթե նույնիսկ ուժգին հարվածեմ հատակին: Ես հավանաբար ժպտացի տարօրինակ մի ժպիտով, որ պիտի նշանակեր հետևյալը. «Հրաշալի է, որ ձեր խաղալիքները չեն բեկորվում: Ափսոս միայն, որ ես դրանց մեջ չեմ գտնելու իմ տոնածառի փշաքաղ երկյուղածությունը»: Բայց հետո մտածեցի` դա այնքան էլ վատ չէ: Ի վերջո, պետք է որ տարբեր լինենք: Եվ, անկեղծ ասեմ, ինձ հետզհետե սկսեց դուր գալ նոր խաղալիքի վստահ, անբաժան փայլը:

Հովիկ Չարխչյան6a4d1a082cf4ad111a4d9848cc1f7483

ՓԱԽՈՒՍՏԻ ԹԵՍՏԸ

27 Դկտ

Մի ամերիկացի գրող ու հոգեբան կա` Թիմոթի Լիրի: Նրան դատապարտեցին թմրանյութեր պահելու համար: Բանտարկության վայրը ճշտելու համար Լիրիին առաջարկեցին լրացնել թեստ: Եվ գրողն այնպես արեց, որ իրեն, համաձայն թեստի, ընտրեն դաշտային աշխատանքների համար, իսկ հետո այդ վայրից փախուստի դիմեց: Միայն այդ դեպքից հետո կալանավայրի աշխատակիցները տեղեկացան, որ հիշյալ թեստը տարիներ առաջ մշակել էր հենց Թիմոթի Լիրին:

1431863168354

ԳԼԽԱՎՈՐ ԹԵՄԱՆ

27 Դկտ

Ընթերցողների մեծամասնությունը ամերիկացի գրող Ռեյ Բրեդբերիի «451 աստիճան ըստ Ֆարենհայթի» վեպի գլխավոր թեման համարում է իշխանական գրաքննության միջոցով մարդու անհատականության ճնշումը: Սակայն հեղինակը համաձայն չէ նման կարծիքի հետ: Մի առիթով Բրեդբերին ասել է, որ իր հիմնական ասելիքը վերաբերում է հեռուստատեսությանը: Նա պնդում է, որ հեռուստատեսությունը ոչնչացնում է ընթերցանության հանդեպ հետաքրքրությունը և դա փոխարինում է զվարճանքով, իսկ խորը գիտելիքները ստորադասվում են մակերեսային «ֆակտոիդներին»:

gallery_43cff102

ԿԱԼԻԳՈՒԼԱՅԻ ՊԱՏԵՐԱԶՄԸ

17 Դկտ

Աստված հեռու պահի խելագար առաջնորդներից:
Հռոմի կայսր Կալիգուլան մի անգամ պատերազմ հայտարարեց ծովերի աստված Նեպտունին: Նա իր զորքերը տարավ ծովափ և զինվորներին հրամայեց նիզակները ջուրը նետել:

be5f19079d0f

ԼԱՎԱԳՈՒՅՆՆԵՐԸ` ՓՈՂՈՑՈՒՄ

15 Դկտ

Նույնիսկ փողոցային մշակույթը պիտի լինի բարձրակարգ: Օրինակ, Տորոնտոյում այդ մասին հոգ են տարել տեղի իշխանությունները: 1980 թվականից ի վեր երաժիշտները, որոնք ցանկություն են ունենում այդ քաղաքի մետրոյի կայարաններում, անցումներում փող վաստակել` իրենց արվեստը ցուցադրելով, չեն կարող պարզապես գործիքը վերցնել ու իջնել ստորգետնյա տարածք: Ամեն տարի հատուկ մասնագիտական հանձնաժողովը լսումներ է կազմակերպում և բազմաթիվ ցանկացողներից ընտրում է ընդամենը 75 անհատ կատարողների: Իսկ եթե հայտ են ներկայացնում երաժշտախմբեր, ապա նրանք կարող են ելույթ ունեալ միայն հատուկ արտոնագրի առկայության պայմաններում, որի համար, ի դեպ, քննություն հանձնելուց զատ վճարում են 150 դոլար: Միայն այս ամենից հետո երաժիշտին հատկացվում է կոնկրետ տարածք և նշվում այն ժամանակահատվածը, երբ նա կարող է իր ունակությունները ցուցադրել քաղաքացիներին:

o-SUBWAY-MUSICIAN-facebook

ՄՏԱԾԵԼՈՒ ԲԱՆ Է

11 Դկտ

1898 թականին «Ինչ բան է արվեստը» տրակտատում Լև Տոլստոյը թվարկեց այն երեք գործոնները, որոնք նպաստում են արվեստի կործանմանը`
ա) արվեստի վերածումը մասնագիտության,
բ) քննադատությունը,
գ) գեղարվեստի դպրոցները:

1028780556

ՔԻՇՄԻՇ ԼԵՆԻՆԻՆ

10 Դկտ

Բոլշևիկները բարձել են 100 վագոն քիշմիշ և ուղարկել Մոսկվա: Գնացքների վրա փայլում էր «Նվեր Բաքվի պրոլետարիատից Լենինին» մակագրությունը: Քաղաքը մնացել է առաց քիշմիշի:
«Յառաջ» օրաթերթ, 1920 թ. հունիսի 22

yellow-raisins-kishmish

ՍՈՄԵՐՍԵԹ ՄՈԵՄ

10 Դկտ

Չեմ հիշում` ո՞ր իմաստունն է մարդկանց խորհուրդ տվել հանուն հոգեկան հավասարակշռության օրը երկու անգամ անել այն, ինչ նրանք չեն սիրում: Անձամբ ես ճշտությամբ եմ կատարում այդ պատվիրանը` ամեն օր վեր եմ կենում անկողնուց և ամեն օր պառկում եմ քնելու:

e6908a0773bebeddaba1d4e5df15fb7f

ԳՐԱԿԱՆՈՒԹՅԱՆ ԳՐԱՄԵՔԵՆԱՆ

10 Դկտ

1868 թ հունիսի 23-ին ամերիկացի գյուտարար Քրիստոֆեր Լեթեմ Շոուլզը ստացավ արտոնագիր իր նոր սարքի համար, որը առաջին գրամեքենայի նախահայրն էր: Արտադրությունը սկսվեց մի քանի տարի անց և 1874 թվականին դուրս եկավ շուկա: Մարկ Տվենը ձեռք բերեց դրա փորձնական օրինակը մինչև մասսայական ատադրությունը: Նրա գրամեքենան կրում էր Remington №1 անվանումը: Հենց դրանով էլ գրողը լույս աշխարհ բերեց «Թոմ Սոյերի արկածները» վեպը: Ավելի ուշ հրատարակիչները վերհիշեցին, որ Տվենից մեքենագիր վիճակում ստացված առաջին գործը եղել է 1875 թվականին «Ատլանտիկ մանթլի» հանդեսում տպագրված «Հին ժամանակները Միսիսիպիի վրա» ստեղծագործությունը: Ամեն դեպքում, հեղինակն իր ինքնակենսագրականում հպարտությամբ գրել է. «Ես առաջին մարդն եմ, ով գրամեքենան օգտագործել է գրականության մեջ»:

aY6yJeivDm3nT39ICmb2FA-article

ԱՓՍՈՍ

24 Նյմ

Գիշերվա փողոցում մենակ մնացած մարդը հենց այնպես միայնակ չդարձավ: Նրան լքեցին: Նախ ցերեկը լքեց, հետո` համբերությունը, հետո` սպասման իմաստը և ապա բոլոր նրանք, ովքեր գնացին վերադարձի խոստումով: Գիշերում մնացած մարդը պիտի չիմանար, որ ապահով լույսի հրապույրն ավելին է, քան մոլորված մարդու նվիրումը: Եվ մարդն այնտեղ էր, որովհետև նա մենակ էր շատերի մեջ, երբ շատերը մեկուսի էին միասին:
— Ափսոս,- ասաց գիշերվա միջի միայնակ մարդը, երբ արդեն հեռանում էր: Ու ոչ ոք չկար, որ իմանար, թե ինչն էր ափսոս: Ափսոս էր, որ այլևս չունե՞ր, թե՞ ափսոս էր, որ այլևս չկար: Իսկ դրանք տարբեր բաներ են:

Հովիկ Չարխչյան

1444

ԱՆՀԵՏԱՑԱԾ ՏԱՌԸ

20 Նյմ

Ֆրանսիացի մի գրող կա` Ժորժ Պերեկ: Նա 1969 թվականին վեպ հրատարակեց «La disparition» (Անհետացում) վերնագրով: Ստեղծագործության առանձնահատկությունն այն էր, որ վեպում չկար ոչ մի e տառ, թեև դա ֆրանսերենում ամենագործածականն է: Այդ նույն սկզբունքով` առանց e-երի, գիրքը թարգմանվեց անգլերեն, գերմաներեն, իտալերեն: Ռուսները նույնպես հետևեցին օրինակին, միայն այն տարբերությամբ, որ ռուսերենում բացակայում էին բոլոր օ տառերը, քանի որ օ-ն է ռուսերենի ամենագործածական տառը:images

%d bloggers like this: